Presidentja Vjosa Osmani ka dekoruar në Berlin kryetarin e Komisionit për Punë të Jashtme në Bundestagun gjerman dhe ish-ministrin, Michael Roth, me Medaljen Presidenciale të Meritave.
„Si një mbrojtës i palëkundur i së ardhmes së Kosovës në BE dhe një zë që ka pasqyruar vazhdimisht aspiratat tona në skenën ndërkombëtare, sonte në Berlin dekorova Michael Roth me Medaljen Presidenciale të Meritave—një simbol mirënjohjeje nga populli i Kosovës“, shkruan presidentja Osmani. Faleminderit, z. Roth, për përkushtimin tuaj të palodhur në afrimin e dy vendeve tona dhe angazhimin për thellimin e bashkëpunimit bilateral, ka thënë presidentja e Kosovës.
Pas marrjes së kësaj medalje, Roth ka thënë se një Kosovë demokratike dhe e pavarur është interes strategjik i Europës.
“Kosova na takon neve. Dhe Europa i takon Kosovës. Një Kosovë e lirë, demokratike dhe e pavarur në zemër të Europës është në interesin tonë strategjik. Të dashur qytetarë të Kosovës, mund të llogarisni në mua! Miqtë do të jenë miq”, ka shkruar ai.