Finlandezët janë njerëzit më të lumtur në botë, thuhet në Raportin Botëror të Lumturisë, që është publikuar sot. Gjermanët janë në vendin e 22- të.
Kur është fjala për vendet e rajonit, pra të Ballkanit Perëndimor, banorët e Kosovës janë më të lumturit!
Kosova është në vendin e 29 në listën e shteteve më të lumtura në botë, në një studim që është zhvilluar në 147 shtete.
Nga vendet e rajonit, pas Kosovës renditen Serbia (31), Mali i Zi (71), Kroacia (72) dhe Maqedonia e Veriut (86). Ndërsa Shqipëria renditet e 89-ta.
Kjo renditje është bërë nga Qendra Kërkimore e Mirëqenies në Universitetin e Oksfordit dhe bazohet në anketat për vetëvlerësimin e personave që janë pyetur për jetën e tyre.
Ata e kanë vlerësuar jetën e tyre nga 0-10. Zero është jeta më e keqe e mundshme dhe 10 jeta më e mirë e mundshme.