Kryeministri në dorëheqje i Serbisë, Millosh Vuçeviq, ka komentuar marrëveshjen e nënshkruar dje mes Kosovës, Shqipërisë dhe Kroacisë për bashkëpunim në fushën e mbrojtjes.
Në platformën X, ai ka shtruar pyetjen se kundër kujt është i menduar ky bashkëpunim, duke shtuar se “tashmë është e qartë se shteti i fortë i Serbisë na përshtatet vetëm neve”.
“Shpresoj që tani të jetë e qartë për çdo qytetar të Serbisë se një shtet i fortë i Serbisë është i përshtatshëm vetëm për ne. Nëse nuk e mbrojmë dhe nuk e ndërtojmë, nuk na pret asgjë e mirë”, shkaruan ai.
Vuçeviq shtron pyetjen se cili është interesi i dy anëtarëve të NATO-s për të hyrë në bashkëpunim ushtarak me Kosovën.
Edhe Ministria Serbe e Punëve të Jashtme reagoi ndaj kësaj marrëveshjeje, duke theksuar se do të kërkojë sqarime shtesë nga Shqipëria dhe Kroacia lidhur me këtë aleancë.
Në anën tjetër, Ministri i Mbrojtjes i Kosovës, Ejup Maqedonci, tha se synimi i bashkëpunimit nuk është kërcënim për askënd, por mesazh për ata që synojnë të kërcënojnë rajonin.