Vitin e kaluar, popullsia në Gjermani arriti nivelin më të lartë të të gjitha kohërave. Sipas një vlerësimi të Zyrës Federale të Statistikave, të paktën 84.3 milionë njerëz jetonin në Gjermani në fund të vitit 2022, më shumë se kurrë më parë në fund të një viti. Krahasuar me një vit më parë, popullsia u rrit me 1.1 milionë. Arsyeja për këtë rritje të madhe ishte niveli rekord i imigracionit.
Vlerësohet se 1.42 deri në 1.45 milion njerëz më shumë erdhën në Gjermani vitin e kaluar sesa u larguan jashtë vendit. Kjo do të thotë se imigrimi neto ishte më shumë se katër herë më i lartë se në vitin e kaluar dhe më i lartë se në çdo kohë që nga fillimi i matjeve në vitin 1950. Përveç një numri të lartë të refugjatëve të luftës nga Ukraina, u rrit ndjeshëm edhe emigracioni i njerëzve të kombësive të tjera.
Në anën tjetër, një rënie e numrit të lindjeve dhe rritja e numrit të vdekjeve pati një efekt frenues në rritjen e popullsisë në vitin 2022. Numri i lindjeve ka qenë rreth shtatë për qind më i ulët krahasuar me vitin 2021, pra lindën rreth 735.000 deri 745.000 foshnja. Nga ana tjetër, në Gjermani vdiqën 1.06 milionë njerëz, gjë që është katër për qind më shumë se një vit më parë.