Oda Ekonomike Gjermano-Kosovare (OEGJK) zhvillon në dy ditët e ardhshme një vizitë interesante zyrtare në Frankfurt të Gjermanisë, ku do të ketë takime të shumta.
Në delegacion do të jenë presidenti i Bordit të OEGJK, Ylli Dushi, dhe Drejtorit Ekzekutiv, Besnik Vasolli.
Qëllimi i vizitës, siç thonë ata, është forcimi i bashkëpunimit ekonomik ndërmjet Kosovës dhe Gjermanisë, si dhe promovimi i ITP Prizren si një qendër e re për inovacion, teknologji dhe investime të huaja.
Gjatë qëndrimit në Frankfurt do të ketë edhe takime me përfaqësues të rëndësishëm nga sektori financiar, energjia e gjelbër, industria e sigurimeve dhe zhvillimi ekonomik.
Më 26 gusht 2025 do të mbahet një event biznesor në Frankfurt, ku do të prezantohen mundësitë për investime në Kosovë dhe përfitimet që ofron ITP Prizren si një platformë për zhvendosjen e shërbimeve dhe zhvillimin e bizneseve inovative.
Temat kryesore të vizitës do të jenë thellimi i partneritetit ekonomik Kosovë–Gjermani, tranzicioni i gjelbër dhe energjia e ripërtëritshme, mundësitë për investime dhe zhvendosje shërbimesh në ITP Prizren si dhe lidhja e bizneseve kosovare me rrjetet gjermane dhe evropiane.