“Barrikadat në veri të Kosovës duhet të hiqen. Nëse personi që i ka vendosur fizikisht nuk do ta bëjë, atëherë KFOR-i duhet ta bëjë këtë, me mbështetjen politike të presidentit të Serbisë, i cili me këmbëngulje pretendon se nuk e di se kush i ka vendosur”, tha Natasha Kandiq, themeluese e Fondit për të Drejtën Humanitare për gazetën “Danas”.
Duke iu përgjigjur thirrjes së kryeministres së Serbisë Ana Brnabiq që organizatat e sektorit civil të flasin për situatën në Kosovë, duke thënë se situata atje është “në prag të konfliktit të armatosur”, Kandiq thotë se Presidenti i Serbisë Aleksandar Vuçiq, kryeministrja dhe kryetari i Kuvendit të Serbisë duhet të ndalen me deklarata dhe veprime jashtë dijes publike, me të cilat inkurajojnë grupet dhe partitë ekstremiste të mblidhen për të shkuar në front“.
“Mos i çmendni qytetarët, veçanërisht serbët në Kosovë për kthimin e pjesëtarëve të policisë dhe ushtrisë serbe në Kosovë, ndaloni lojërat e rrezikshme politike – largimi nga institucionet e Kosovës, ngrirja e mandateve, persekutimi i serbëve të Kosovës që nuk pajtohen me keqpërdorimet e institucionit të deputetëve. Largimi nga skena publike i drejtorit të zyrës për Kosovën, i cili me retorikën e tij helmuese turpëron çdo qytetar të denjë të Serbisë, do të ndihmonte në qetësimin e situatës. Prioritet është inicimi i një debati ekspertësh për propozimin gjermano-francez për normalizimin e marrëdhënieve me Kosovën, pa pjesëmarrjen e “patriotëve politikë”, thekson bashkëbiseduesi ynë.
Kryeministri i Kosovës Albin Kurti ka obligim, shton ajo, që të nisë pa vonesë procesin e zbatimit të marrëveshjeve të nënshkruara.
“Ai bëri gjëra të mira për të eliminuar diskriminimin e Republikës së Serbisë ndaj shqiptarëve, kishte të drejtë të kërkonte respektimin e simboleve të Kosovës për të gjithë ata që jetojnë në atë vend, por tani le të tregojë se po lufton njëlloj për mirëqenien e serbëve dhe të joshqiptarëve të tjerë”, përfundon Natasha Kandiq.