Federata serbe e Futbollit është gjobitur me 20.000 franka nga FIFA, për shkak të shfaqjes së një flamuri me një hartë ku Kosova ishte paraqitur si pjesë e Serbisë dhe ku shihej mesazhi „Nuk ka dorëzim“.
Ky flamur u pa në zhveshtoren e përfaqësueses serbe gjatë ndeshjes midis Brazilit dhe Serbisë, të zhvilluar më 24 nëntor në Katar, në kuadër të Kampionatit Botëror, ku Serbia u eliminua pas garave në grupe.
Sipas FIFA-s, me shfaqjen e këtij flamuri, ku ishte përfshirë harta e Kosovës me ngjyrat e flamurit serb dhe me mbishkrimin “Nuk ka dorëzim”, Serbia ka shkelur dy nene të Kodit Disiplinor të saj.
![](https://diaspora-today.com/wp-content/uploads/2022/12/xhaka-1024x576.jpg)
FIFA kishte nisur procedurë disiplinore për këtë rast, pas një ankese të paraqitur në nëntor nga Federata e Futbollit të Kosovës (FFK).
FFK-ja e kishte cilësuar këtë veprim si akt shovinist. “Akte të tilla shoviniste nuk kanë vend në një ngjarje sportive, e aq më pak brenda objekteve ku zhvillohet ngjarja më e madhe e futbollit botëror, prandaj FFK si anëtare e barabartë me të gjithë anëtarët e tjerë të FIFA-s, kërkon nga ky institucion që të ndërmarrë masa sanksionuese ndaj veprimeve që nxisin urrejtje mes popujve dhe janë kundër vlerave njerëzore”, thuhej në njoftimin e FFK-së.
Ndryshe trajneri serb Dragan Stojkoviq dhe disa lojtarë kanë qenë shumë agresivë gjatë ndeshjes Zvicër – Serbi, ndaj lojtarëve me origjinë nga Kosova. Në veçanti Granit Xhaka është sulmuar nga disa lojtarë madje edhe fizikisht. Ndërsa trajneri Stojkoviq shante hapur shqiptarët.