Qeveria suedeze ka zgjatur ndalimin e hyrjes në këtë shtet për vendet jashtë Bashkimit Evropian, deri më 31 janar 2022.
Ky vendim përfshin edhe Kosovën, qytetarët e së cilës, muajve të fundit nuk janë lejuar të hyjnë në shtetin skandinav. Në njoftimin e qeverisë suedeze thuhet, se ndalimi i hyrjes në këtë shtet bazohet në një rekomandim të Këshillit të Bashkimit Evropian, që është në fuqi për një kohë të pacaktuar.
Rregullorja përcakton se një shtetas i huaj që udhëton në Suedi nga një vend jashtë BE-së u nënshtrohet ndalesave deri në fund të janarit të vitit të ardhshëm.
Kjo nuk vlen vetëm për ata që bëjnë pjesë te “përjashtimet”. Sipas njoftimeve të qeverisë suedeze, përjashtimet përfshijnë shtetasit e huaj që kanë leje qëndrimi në Suedi, që kanë ndonjë nevojë emergjente ose që kanë ndonjë funksion në këtë shtet.
Këto ndryshime do të hyjnë në fuqi më 5 nëntor 2021.
Ndërkaq, ndalesat për shtetasit e vendeve të Bashkimit Evropian do të shtyhen deri më 30 nëntor të këtij viti.
Shtetasit e BE-së mund të hyjnë në Suedi nëse e paraqesin certifikatën e vaksinimit, një test negativ të kryer në 72 orët e fundit, ose dëshminë se janë shëruar nga COVID-19 në gjashtë muajt e fundit.