Qeveria gjermane shënoi një rekord të ri në eksportin e armëve në vitin 2023, duke realizuar shitje me vlerë të paktën 11,71 miliardë euro (12,9 miliardë dollarë), kryesisht falë ndihmës së dërguar në Ukrainë.
Rekordi i mëparshëm prej 9,35 miliardë euro nga viti 2021 ishte tejkaluar tashmë me 25% në mes të dhjetorit, njofton agjencia gjermane e lajmeve DPA.
Krahasuar me vitin 2022, këtë vit rritja ishte 40%.
Më shumë se një e treta e eksporteve të miratuara shkuan në Ukrainë për fushatën e saj të mbrojtjes kundër pushtuesve rusë, në total 4,15 miliardë euro.
Shifrat i referohen periudhës nga 1 janari deri më 12 dhjetor, gjatë së cilës qeveria gjermane miratoi eksportin e armëve me vlerë 6,15 miliardë euro dhe pajisje të tjera ushtarake me vlerë 5,57 miliardë euro.
Pothuajse 90% shkuan në shtetet e BE-së dhe NATO-s, Ukrainës dhe vendeve që trajtohen në mënyrë të ngjashme me shtetet e NATO-s për sa u përket kontrolleve të eksportit të armëve, për shembull, Japonia, Australia dhe Koreja e Jugut.